ஊழின் சிக்னல்

"ம்ம்மா ..."
ஏற்றிவிட்ட கண்ணாடிசாளரத்தையும் 
மீறி என் காலடியில்
வந்து விழுந்தது
அந்த அழுக்கு குழந்தையின்
இரவல் குரல்..
கறுத்த கைகள் நீட்டி
சன்னலைத் திறந்துவிட
முயல்கிறது...தனக்கான உரிமையை
கேட்கும் பாவனையுடன்..!!
சில்லறை தேடி என் கைகள்
துழாவ, அருகிருந்து
பதறுகிறாள் மகள் "அப்பா ..சீக்கிரம்
சிக்னல் போடப்போறாங்க .."
எளிய சிக்னல் நிறுத்தங்கள்
சோதிக்கின்றன...நமது காருண்யத்தை..!!
பச்சை விழ, சாளரத்தை இறக்கி
சிறு பிஸ்கட் நெகிழியையும்,
நீர்ப்போத்தலையும்
தேவதைக்கு அளிக்கும் சாக்கில்
கரிய பாதங்களை வருடி
ஊழின் பொருட்டு மன்னிப்பு
கேட்டுக்கொள்கிறேன்..!!

---அனலோன்