அன்புள்ள மிஷ்கின் அவர்களுக்கு,

வணக்கம்.

இப்போதுதான் ஓநாயும் ஆட்டுக்குட்டியும் படத்தை ஹாட் ஸ்டாரில் பார்த்தேன். இந்த கடிதம் வணிக சம்மந்தமானதல்ல, அது சம்மந்தமாக எழுதினாலும் யாருக்கும் உபயோகமும் இல்லை.

தவிர இந்த படத்தையும் நீங்கள் வணிக ரீதியில் சமரசம் செய்ய முற்படவில்லை என்பது வேறு விஷயம். "ஏன் முன்பு தியேட்டரில் பார்க்கவில்லை?" என்ற கேள்விக்கு நிச்சயம் என்னிடம் பதிலில்லை, ஏனெனில் படம் வந்ததே தெரியாத அளவிற்கு எனக்கு ஏற்பட்ட விபத்தோ, மகனின் பிறப்பில் ஏற்பட்ட கோளாறால் மருத்துவமனையிலோ அல்லது வேறு ஏதாவது பண தேவை சம்மந்தப்பட்ட பைத்தியமாகவோ நான் இருந்திருக்க கூடும்.

நிற்க,

படத்தின் கதாநாயகன் சர்வ நிச்சயமாக இளையராஜா தான், இந்த படத்தின் காட்சிகளை பார்வையாளர்களுக்கு வசனம் எழுதி புரிய வைக்க வேண்டிய தேவையை ஏறக்குறைய விலக்கியே வைத்து விட்டார். படத்தை பதைபதைப்பாய் கொண்டு சென்றதில் அவர்தான் போர் வீரன்.

ஓநாய் நீங்கள் தான். உடல் மொழியில் அப்படியே கொண்டுவந்திருக்கிறீர்கள், உடல் முழுவதும் காயம்பட்டு கிடந்தாலும் கொஞ்சம் கூட குறையாத வேட்டையாடும் துடிப்பும், இழப்பின் ஊமை தவிப்பும், அதுவும் ஒவ்வொரு இழப்பின்போதும் மெளனமாக தலை குனியுமிடம் உச்சம். திருநங்கை ஏஞ்சல் கிளாடியா தலை நிமிர்ந்து உங்களை பார்க்கையில், காப்பாற்ற இயலாமல் தரை நோக்கும் காட்சி உச்சமய்யா. என்னால் இன்னமும் அதிலிருந்து மீண்டு வர இயலவில்லை. படத்தில் உங்களுக்கு வசனமே இல்லையோ என நினைத்திருந்த நேரத்தில் அந்த "எட்வினண்ணா நீங்களாவது கதை சொல்லக் கூடாதா" என குட்டி இளவரசி கேட்கையில் ஆரம்பித்தீர்களே? கண்கள் நிரம்பி வழிந்து கொண்டே இருந்தது.

ஸ்ரீ எனும் ஆட்டு குட்டியின் உடலில் ஒரு டன் சுமையை வைத்து சுமக்க சொல்லி விட்டீர்கள், அற்புதம் அந்த குட்டி எந்த வித யோசனையுமில்லாமல் உங்களின் உடலைக் கூட சேர்த்தே சுமந்து வந்தது.

இதை தாண்டிய வசீகரிப்பை சொல்லிக்கொண்டே போகலாம்

"நீ டாக்டர், நீ டாக்டர்" என கையில் கொடுத்த பணத்தை வீசி எறிந்து விட்டு குதூகலிக்கும் மனநிலை தவறியவர்.

"அவனை அரெஸ்ட் பண்ணது தப்புதான் சார், நியாயமா உங்களை முதல்ல பிடிச்சிருக்கணும்" வெறியோடு குற்றவாளியை தேடி தொலைத்துக்கொண்டே இருப்பவனின் கோபம்.

"பணமெல்லாம் தேவைப்படாது, நான் சாகப்போறேன் அதுக்கு முன்னாடி எட்வினை கொல்லனும்" முதன்மை தொழில்முறை வேலைக்காரனின் கூரிய வசனம்.

"மூத்திர பையோட அலைஞ்சிட்டிருக்கேன், அவனை உயிரோடவும், உயிரில்லாதவும் பார்க்கணும்" கடிபட்ட கரடியின் வெறி.

"கொல்லப்பட்டு சாவும் போலீஸ்காரர்கள் வித விதமான குரலெழுப்பி சாவது,

அதிலும் அந்த "ஐயா", பதவியை அந்த வார்த்தையாலே தக்கவைத்து, சாகும் போதும் அது தவிர வேறு எண்ணமே வராத எழுபது விழுக்காடு காவலர்களின் நிலைமை.

"நல்லவேளை அதில ஒருத்தன் மார்ல உதைச்சான், மயக்கமாகி விழிச்சு பார்க்கிறேன், இங்கே இருக்கேன்" எனது நெஞ்சிற்கு கடத்தப்பட்ட வலி.

சாவின் விளிம்பிலும் யாரும் துப்பாக்கியால் சாக கூடாது என மேல் நோக்கி சுடும் அப்பா.

ஒரு பெரும் கொலைகாரன் கதவை திறந்து விடச்சொல்லி பார்வையால் காவலாளியை கெஞ்சும் இடம்

"அம்மாக்கு என்னாச்சு எட்வின் அண்ணா?" என்ற பதில் சொல்லவே இயலாத கேள்விக்கு,

"செத்துட்டாங்க" ஒரே வார்த்தையில் அதை முடித்த விதம்.

ஒரு திரில்லர் படத்தில் மனித நேயத்தை விதைக்கும் வித்தை எப்படி கை வந்தது?

இந்த அரைகுறை எழுத்தை வைத்துக்கொண்டு என்னால் இதற்கு மேல் எழுத தெரியவில்லை

வேறென்ன....

உங்களுக்கும், பவாவிற்கும் நன்றி மிஷ்கின், ஏனெனில் உங்களை ஒரு இயக்குனராக இல்லாமல் "இந்த ஜோயல் இருக்கானே இவன்தான் என் தாய், தகப்பன், நண்பன் எல்லாம்... மத்தியானம் அவன் பட்டினி கிடந்தது எனக்கு பத்து ரூபாய்க்கு சோறு வாங்கி போட்ருக்கான், அவன் கணக்கையே அடைக்க முடியல பவா" என வேறு ஒரு கோணத்தில் எல்லா நாளும் கார்த்திகையில் அறிமுகம் செய்ததே அவர்தான். புத்தகங்களை அடுத்தநாளே அனுப்பிய என் அக்கா சைலஜாவிற்கும் அன்பு.

உங்கள் காட்டின் இந்த இலை, இனி ஒநாயையும் ஆட்டுக்குட்டியையும் அதன் உள்ரேகை போல சுமந்து கொண்டே திரியும்.

இடம் -ஜெயமோகன்

இந்த இரண்டாவது வார வீட்டின் உள்ளிருப்பில் "என்னடா இது" என்ற மன நிலையில் இருந்தேன், சொல்லப்போனால் அதற்கும் இரண்டு வாரங்களுக்கு முன்பே வீட்டில் இருந்தபடி வேலை செய்ய சொல்லிவிட்டார்கள். ட்விட்டர் தோழி மேகா, ஜெமோவின் ஒரு சிறுகதை லிங்க் கொடுத்திருந்தார், அதை முடித்துவிட்டு மற்ற கதைகளையும் படிப்போம் என ஜெமோவின் இடம் சிறுகதையை நன்றாக வீட்டில் சூடு இறங்கி கொண்டிருந்த மதியம் 2 மணிக்கு சற்றே எரிச்சலான மனநிலையில் தான் வாசிக்க ஆரம்பித்தேன்,

“கொரங்கா? இதுவா??

“இது பின்ன கொரங்குல்ல?”

“சிரிக்குது?”

“சிரிக்காதா பின்னே? அம்பது ஓடுல்லா உடைச்சிருக்கு?”

அனந்தன் திரும்பி தன் வீடு நோக்கி ஓடினான்.  என்ற வரிகளுக்கு சற்றே சிரிப்பு வந்தது, மறுபடியும் முதலில் இருந்து வாசிக்க ஆரம்பித்தேன். வரிக்கு வரி சிரிப்பு தாங்க இயலவில்லை.

“ஏமான், சொறியுது”

“கொரங்கு சொறியாம பின்ன டான்ஸாலே ஆடும்? வெளங்காப்பயலாட்டு இருக்கானே”  என்ற போது இருந்த சிரிப்பு
”சாதி நாயர்மாரு என்ன பிடிப்பானுவ?” என்றன் அனந்தன்

“எலிபிடிப்பானுவ” என்றான் தவளைக்கண்னன் கொஞ்சம் சப்தமாக மாறியது.
“ஒண்ணுக்கடிக்கும்பம் புடுக்க பிடுங்கீட்டுப்போற எனமாக்கும்”

“ஆருக்க புடுக்க?” என்றான் அனந்தன். என்ற வரிகளுக்கெல்லாம் என் வீடே அதிரும்படி சப்தமிட்டு சிரித்துவிட்டேன். வரிக்கு வரி சிரிப்பை கூட்டி கொண்டே சென்று விட்டீர்கள் ஜெமோ. அட்டகாசம். எனது தனிமை, கவலை, பணிச்சுமை கடந்த நாட்களின் துயரங்கள் எல்லாம் எங்கோ ஓடி ஒழிந்து விட்டதை போல உணர்வு. படித்து ஒரு மணி நேரம் கடந்த பிறகும்,

"நாயருண்ணா மூளை இருக்கணும். இல்லேண்ணா $ண்ணி இருக்கணும்.. இது ரெண்டும் இல்லேண்ணா என்ன செய்ய?”

"ஹணிமூண் … ஹனுமானுக்கு இங்கிலீஷ்லே"என்பதெல்லாம் ஞாபகத்தில்,  சிரித்துக்கொண்டே தான் இதை எழுதிக்கொண்டிருக்கிறேன். சுமையை மறக்க செய்த உங்களுக்கு நன்றி என்ற வார்த்தை மிக மிக குறைவு ஜெமோ.எங்கோ ஒரு மூலையில் இருந்துகொண்டு, சக மனிதனின் மனதின் சுமையை  முற்றிலும் குறைத்து மகிழ்விக்கும் கலைஞனுக்கு ஒரு சாதாரண வாசகன்  என்ன கைமாறு செய்துவிட முடியும்?     

அட்டகாசமான நகைச்சுவை குறும்படமாக இடம் சிறுகதையை பதிவு செய்யலாம்.  தமிழிலோ மலையாளத்திலோ அல்லது ஒரே சமயத்தில் இரண்டிலுமோ, இதை இளம் வருங்கால இயக்குனர்கள் ஜெமோவின் உதவியுடன் முயற்சி செய்ய வேண்டும் என்பது எனது ஆசை.

இந்த சிறுகதையை ஜெமோவின் இணையதளத்தில் படிக்க:
Click இடம் [சிறுகதை]

கடவுளும் பகுத்தறிவும்

கடவுள் என்பவனை கோவிலில், வேளாங்கண்ணியில், தர்க்காவில் குழந்தையின் உடல்நலம் பெற மந்திரிக்குமிடங்களில் கண்டு கொள்ளும் எளியவன் தமிழகம் முழுவதும் என்னைப்போல நிறைய பேர் உண்டு. அவனை மனிதன் என்றோ ஹிந்து என்றோ குறிப்பிட்டாலும் அதை அவன் பெருமையாகவோ அவமானமாக கருத மாட்டான். அந்த வார்த்தையை சாதாரணமாக கடந்து செல்வான்.அவனுக்கு எல்லா மத கடவுள்களும் ஒன்றே. சக ஜீவி. அதாவது சக உயிரை நேசிப்பவன். அவன் அவமானங்களுக்கு பயப்படுபவன், உழைத்து வாழ்பவன், மனசாட்சி மற்றும் நேர்மைக்கு கட்டுப்படுபவன். நாட்டின் குடிமகனாக ஒழுங்காக வரி செலுத்துபவன். குறிப்பாக ஓட்டுக்கு பணம் வாங்க மறுப்பவன். பிச்சைக் காசுக்காக, ஓட்டுக்காக, பதவிக்காக ஒரு குறிப்பிட்ட மதத்தை மட்டுமே குறி வைத்து தாக்கும் போலி நாத்திகம் பேசுபவனல்ல. தன் வாழ்வை நேரடியாக எதிர்கொள்பவன்.

அவ்வாறு எதிர்நோக்க கையாலாகாத பேடித்தனம் கொண்ட சிலர்,  எளியவர்களின் நம்பிக்கையை கேலி செய்வார்களே அது போல இல்லை அவன் வாழ்வு.

"ராமனும், விநாயகனும் வட நாட்டுக் கடவுள், வணங்காதே என்பவர்களே. ஏசு, அல்லாவெல்லாம் நீங்கள் பிரசவம் பார்க்க பக்கத்து வீட்டில் பிறந்தார்களா? அவர்கள் எந்த தேசம் என்றாவது உங்களுக்கு தெரியுமா? ஒரே ஒரு தடவை அவர்களை வழிபடும் மக்களிடம் கடவுள் இல்லை என நேரடியாக குறை சொல்லும் யோக்கிதை உங்களுக்கு உண்டா? முரசொலியை பிணத்திடம் வைத்து புதைத்து அதை அந்த பிணம் படிக்கும் என்ற போது பக்கத்தில் நின்று பல்லைக் காட்டீனீர்களே, அப்போது இளித்தது நீங்கள் இல்லை, உங்கள் பகுத்தறிவு. கடவுள் இல்லை என்பவன், கடவுள் தான் என் வாழ்வு என்பவனிடம் கடவுள் பற்றி முழுவதும் தெரியாமல்,  A Guide to Rational Living கூட படிக்காமல், அதைப் பற்றிக்கூட தெரியாமல் போலிப் பிரச்சாரம் செய்வது தேவையான ஆணியா?  ஊரெல்லாம் நாத்திகம் எனும் நடிப்பைக் காட்டிக்கொண்டு பெண்டாட்டியை அத்திவரதரிடம் விஜபி தரிசனத்திற்கு அனுப்பும்போது "சோற்றைத்தான் தின்கிறோமா?", என எண்ணியதில்லையா? சிறுபான்மைக்கு ஆதரவெனில் வெறும் நான்கு சதவீதமுள்ள பிராமணர்களின் நலனில் உங்கள் நிலையென்ன?" ஒரு ஆணிற்க்கு ஒரு பெண்ணே அதிகம் என்ற நெறியில் நிம்மதியாக அமைதியாக வாழ்பவனிடம், வளர்த்த மகளை திருமணம் செய்தால் என்ன தவறு என விவாதிப்பவன் என்ன ஜென்மம்?"

என கேட்கத் தெரியாதவன். குறிப்பாக தமிழிலும் பெரியார் எழுதிய புத்தகங்களை ஒரு வரி விடாமல் படித்தவன்.

கடைசியாக ஒன்று... நாத்திகம் தேடி ஓடிய கண்ணதாசன் கூற்று, கடவுள் உண்டு என்பது இயற்கையில் நல் வாழ்வின் வழி, நான் தடம் மாறி தவறான வழி சென்று பின் கண்டு கொண்ட உண்மை. தவிர தமிழகத்தில் நான் இணைந்து பணியாற்றிய நாத்திக தலைவர்கள் பெண் சுகம் காணவும், காசு சம்பாதிக்கவும், சுய நலனுக்காக கட்சிகளுக்கு ஜால்ரா போடவுமே துணை போகிறார்கள், தவிர நாத்திகம் நம் உடலில் தேவையில்லாத இடங்களில் வளரும் மயிர்.ஆழ்ந்த அமைதியில், ஒரு பெரும் ஒளிச்சுடரில் இவை அனைத்தையும் தெரிந்து கண்டு கொண்டேன் ஆகவே ஆஸ்திகமே உயிர்களுக்கெல்லாம் உயிர்....

இங்ஙனம் பொங்கலெனில் முதல் தொலைபேசி அழைப்பாக கிறித்தவ நண்பனிடம் வாழ்த்து பெறும், ரம்ஜான் பிரியாணியை மறக்காமல் அனுப்பும் ஒரு நண்பனிடமும், என் குழந்தை மருத்துவமனையில் இருக்கையில் தன்னிடமிந்த கொஞ்சத்தையும் எடுத்து கொண்டு மருத்துவ மனையில் கொடுத்த மாற்று மத திருமணம் செய்த தோழியையும், நட்பாய் பெற்ற, மனித நேயம் மட்டுமே தான்  வாழ்வு என புரிந்த சக மனிதன்.

கடவுள் உண்டு
கடவுள் உண்டு
கடவுள் உண்டு

தூணிலும்
துரும்பிலும்
உன்னிலும்
என்னிலும்
கடவுள் உண்டு.

நான் நீ சிவம்.

திரௌபதி விமர்சனம்

ட்ரைலர் ஏற்படுத்திய பரபரப்பை படம் ஏற்படுத்தவில்லை, இது ஒரு டாக்குமெண்டரி, பலவருடமாக போராடுகிற  ரிச்சர்டுக்கு படங்கள் பெற்றுத்தரும். ஆனாலும் அவர் நடிப்பை மெருகேற்ற நீண்ட தூரம் போக வேண்டும். போலிப் பதிவுத் திருமணங்கள் பற்றிய தகவல்கள் ரசிக்கும்படி இருக்கின்றது. திரௌபதி கேரக்டர் சிறப்பு. பணமில்லாததாலோ என்னோவோ படத்தில் செயற்கை தன்மை அதிகம், நடிப்பை இன்னமும் மெருகேற்றி இருக்கலாம். ஜுபீனின் பின்னணி இசை நன்று. தனிப்பட்ட முறையிலேயே பொதுவாகவோ இயக்குனர் யாரையும் தாக்கவில்லை என்பது ஆறுதல். வக்கீலாக கருணாஸ் வந்து பக்கம் பக்கமாக கருத்து பேசுவது காலக்கொடுமை.

தேநீர் விற்பவரைப் போல வேடமிட்டு இரண்டு கொலைகளைச் செய்யும் இடங்கள், திருமணம் செய்ததாக சொல்லப்படும் பெண்ணின் தந்தை இறப்பது, கழுத்தை அறுக்கும் காட்சிகள் என எதிர்பாராத காட்சிகளும் இதில் இருக்கிறது. கொஞ்சம் பட்ஜெட் கொடுத்தால் நல்ல பரபரப்பான படத்தை மோகனால் தர இயலும்.

படம் பார்க்காமலே ஒரு தரப்பு எதிர்ப்பதற்கும், ஒரு தரப்பு பயங்கரமாக ஜல்லியடிப்பதற்கும் இந்த படத்தில் ஏதுமில்லை என்பதே எனது தனிப்பட்ட கருத்து. 

ஒரு சீசன் முழுவதும் பேய் படங்களாக வந்து நம்மை சாகடித்ததல்லவா, அது போல ஜாதிப்  படங்கள் தற்போது சம்மந்தப்பட்ட மக்களை தூண்டி நல்ல வசூலை கொடுக்கின்றன. இதை சரியாக புரிந்து கொண்டு மோகன் இரண்டு தலைமுறைக்கு சம்பாதித்து விடுவார். இன்னும் நாலைந்து படங்கள் இரு தரப்பில் இருந்தும் இது போலவே வரும். சம்பாதிப்பார்கள். அதன் பின் மக்கள் வெறுத்துப்போய் தன் சொந்த சோகத்தை பார்க்க போய் விடுவார்கள்.

அதாகப்பட்டது தீபாவளி பண்டிகை போல ஆர்காசமடையவும், ஒரு சமூகத்திற்கே அநீதி இழைக்கப்பட்டது போல நெஞ்சுவலி வந்து கதறவும் இதில் ஒன்றுமே இல்லை அய்யா. 

கற்றதும் பெற்றதும் பகுதி 2

சுஜாதாவின் கற்றதும் பெற்றதும் பகுதி 2.

படித்ததில் சில பிடித்த சுவாரஸ்யமான தகவல்கள் கவிதைகள் கருத்துக்கள்

குழ‌ந்தை அழும்போதெல்லாம்

நான் குதிரையாக‌

வேண்டியிருக்கிற‌து.

இம்ம‌ண்ணில்

என்னைச்ச‌வாரியாக்கி

கைகொட்டி சிரிக்க‌,

குழ‌ந்தைக்குமா ஆன‌ந்த‌ம்?

 -எஸ். வைதீஸ்வரன்

வாழ்க்கை சுருக்கமானது.

பிடிவாதத்திற்கோ, சண்டை போடவோ நேரமில்லை நண்பனே

 -லென்னன்

கண்ணீரை படைத்தது

கடவுளின் தவறா?

ஆனந்தப்பட்டு அதை வடிக்காமல்

அழுது வடிக்கும் மனிதனின் தவறா?

-நீலமணி

கடும் உழைப்பு எதிர்காலத்துக்கு நல்லது. சோம்பேறித்தனம் நிகழ்காலத்துக்கு!

சாவுக்கு இழப்பீடு என்பது நவீன வியாபார உத்திகளில் முதன்மையான இடத்தை பிடித்திருக்கிறது. அரசியல் எனும் வியாபாரத்தில் அது மிக பெரிய முதலீடு

அந்த பெண்ணுக்கு பதினெட்டு பாஷைகள் தெரியும், ஆனால் எதிலும் மாட்டேன் என்று சொல்ல தெரியாது

 -டொராதி பார்க்கர்

வாயை திறக்காமல் ஒன்றுமே தெரியாத முட்டாளை தோன்றுவது, வாயை திறந்து அதை ஊர்ஜிதம் செய்வதை விட மேல்

 -மார்க் டிவைன்

சிலர் பேனா கத்தியால் திருடுகிறார்கள்,

சிலர் பேனாவால்...

 -கத்ரி

"இறந்தவர் யாருப்பா?" என்றார் மருத்துவர்

"நான்தாங்க" என்றார் வந்தவர்         

 -மாணிக்கதாய்

தோழி, உனக்கு குழந்தை பிறந்ததற்கு வாழ்த்துக்கள் உனக்குள் இந்த திறமை இருந்தது எனக்கு அப்போதே தெரியும்.

 -டோரத்தி பார்க்கர்

‘பழைய மன்னருடன் நகர்வலம்

வந்ததாய்ச் சொல்லப்பட்ட

பாகனற்ற கிழ யானை

பட்டத்து ஒப்பனையோடும்

ஓசையற்ற சலங்கையோடும்

தெருவில் இறந்து கிடந்தது’.

 -யாத்ரீகன்

புகழ் வார்த்தைகளை நிஜமென்று நம்ப துவங்கும்போது உனக்கு கேடு காலம் ஆரம்பிக்கிறது

 -ஜிம் ஆலன்

உலகின் ஜனத்தொகையில் பாதிப்பேருக்கு பலாப்பழம் பிடிக்கும், மீதி பேருக்கு பிடிக்காது அவர்கள் ஒருவரை ஒருவர் திருமணம் செய்து கொள்வது வழக்கம்

-ஜிம் ஆலன்

"எல்லாமே மாயை எதுவுமே நிலையில்லை" என்ற நான் என் கார்பெட்டுக்கு அதிக விலை கொடுத்துவிட்டேன்

சாகாத இலக்கியம் படைப்பதை விட

நான் சாகாமல் இருக்கவே விரும்புகிறேன்

 -ஆலன்

அடி முட்டாள்

அயோக்கியன்

அதி புத்திசாலி

ஞானி

அனைவரையும் குளத்தில் குதித்தனர்

ஒரே மாதிரி வட்டம் வட்டமாக வந்தது

 -தென்றல்

தவறுகளுக்காக அவமானப்பட்டால் அதை குற்றங்களாக்கி விடுவீர்கள்

-கன்பூசியஸ்

பிரச்சாரம் பொய் சொல்வதன் ஒரு பிரிவு, அதனால் உங்கள் நண்பர்களை ஏமாற்றலாம் நிச்சயம் எதிரிகளை ஏமாற்ற முடியாது

 -வால்டர் லிப்மன்

ஒரு தரம் காதல் என்னை மீட்டு தந்தது

ஒரு தரம் புல்லாங்குழல் என்னை மீட்டு தந்தது

ஒரு வண்ணத்துப்பூச்சியும் என்னை மீட்டு தந்தது

நான்தான் அடிக்கடி தொலைந்து போகிறேன்

 -பூமா ஈஸ்வரமூர்த்தி

நான் எழுதிய புத்தகங்களுக்காக

குடித்த சுருட்டுகளின் காசு கூட அதிலிருந்து கிடைக்கவில்லை

 -காரல் மார்க்ஸ்

நானே வலிய சென்று எம் ஐ டி யில் ஒரு பாட்டு போட்டியில் கலந்து கொண்டு மூன்றாவது பரிசாக ஒரு சொப்பு மாதிரி கப்பு வாங்கினேன். அதில் கலந்துகொண்டவர்கள் எண்ணிக்கை மூன்று

 -சுஜாதா

என் நீண்ட ஆயுளுக்கும் ஆரோக்கியத்திற்கும் காரணம் தெளிவாக தெரிந்து விட்டது, நான் ஒரு சிகரெட் கூட பிடித்ததில்லை ஒரு பெண்ணை கூட தொட்டதில்லை என் பத்து வயதுவரை

 -ஜார்ஜ் மூர்

"தினமும் சமைக்கும் போது இந்த நீரில் தான் சாதனை செய்தோம் என நினைப்பதுண்டா?" என்று சிரித்தாள் குடும்பத்தலைவியாகி குண்டாகவும் ஆகிவிட்ட முன்னாள் நீச்சல் வீராங்கனை

 -முகுந்த் நாகராஜ்

எனக்கு சட்டமியற்றும் அதிகாரம் இருந்தால் மதமாற்றத்தை உடனடியாக தடைசெய்து விடுவேன்

-மகாத்மா காந்தி சொன்னதாக ஹிந்துமித்திரன் இதழில்

அப்பா சொன்னாரென

பள்ளிக்கு சென்றேன்

தலை சீவினேன்

சில நண்பர்களை தவிர்த்தேன்

சட்டை போட்டுக்கொண்டேன்

பல் துலக்கினேன்

வழிபட்டேன்

கல்யாணம் கட்டிகொண்டேன்

காத்திருக்கிறேன் என் முறை வருமென

 -கனிமொழி

சான் பிரான்சிகோவில் ஆப்பிள் கம்பெனியின் புதிய படைப்பான ஐ போனை வாங்க 40 வது ஆளாக க்யூவில் நின்றவர் ஸ்டீவ் வாஸ்னியாக் ஆப்பிள் கம்பெனி நிறுவனர்களில் ஒருவர்

நன்றி வணக்கம் 

குறுங்கதை-10 சண்டைச்சேவல்

அவனது சண்டைச்சேவல் தோற்றதேயில்லை. அவன் சேவலைச் சண்டைக்குப் பழகுவதற்கு முன்பாக அது ஒரு சேவல் இல்லை என்பதை உணரச் செய்வான். இதற்காக அதிகாலையில் சேவல் தன்னை அறியாமல் கூவும் போது சிறிய மூங்கில் கழியால் அடித்து அது கூவுவதைக் கட்டுப்படுத்துவான். நாட்படச் சேவல் கூவுவதை நிறுத்திக் கொண்டுவிடும். பின்பு சேவலை இன்னொரு சேவலுடன் சண்டைக்குப் பழக்குவதற்குப் பதிலாகத் தண்ணீரை பீய்ச்சியடித்து சேவலை அதோடு சண்டையிடச் செய்வான். தண்ணீர் எந்தத் திசையிலிருந்து பீறிடும் எனத் தெரியாமலும் நனைந்து கண்ணை மறைக்கும் தண்ணீரை எப்படிச் சமாளிப்பது எனத் தெரியாமலும் சேவல் தடுமாறும். பின்பு மெல்லத் தண்ணீரை எதிர்கொள்ளச் சேவல் பழகிவிடும்.

பின்பு சேவலுடன் சண்டையிட பல்வேறு தீப்பந்தங்களை ஏற்பாடு செய்திருப்பான். நெருப்புக் கண் முன்னே சீற்றம் கொள்வதையும் ரெக்கையில் நெருப்பு பற்றிக் கொள்வதையும் கண்டு சேவல் ஆவேசம் கொள்ளும். பின்பு பயந்தெளிந்து நெருப்பைக் கண்டு சேவல் விலகியோடாது. அதன்பிறகு சேவலின் கண்களைக் கறுப்புத் துணியால் கட்டி கிணற்றில் போட்டுவிடுவான். தட்டுத்தடுமாறி அது மேலேறி வர எத்தனிக்கும். ஆனால் சில நாட்களில் கண்களைக் கட்டினாலும் சேவல் திசையறிந்துவிடும்.

அதன்பிறகு சேவலுக்கு உணவு தராமல் பட்டினி போடுவான். அது பசியில் குரல்கொடுத்தபடியே இருக்கும். மண்ணைக் கொத்தித் தின்னும். பின்பு மெல்லச் சேவல் பசியைக் கடந்து போகும். முடிவில் மரத்தில் செய்யப்பட்ட இயந்திர சேவல் ஒன்றை அத்தோடு சண்டையிடச் செய்வான். மரச்சேவலை கொத்தும் நிஜசேவல் ஏன் அச்சேவல் கத்துவதில்லை எனத் திகைத்துப் போகும். பின்பு தானும் அது போலவே கத்தக்கூடாது என்பதை உணர்ந்து கொள்ளும்.

இந்தப் பயிற்சிகள் யாவும் முடிந்தபிறகு அவன் சேவலைச் சண்டைக்குக் கொண்டு வருவான். போட்டியில் அவனது சேவல் எதிராளியின் சேவலை ஒரே அடியில் வீழ்த்திவிடும். ஆனால் வென்ற சேவலுக்கான கொக்கரிப்போ, சிறகடிப்போ எதுவும் இருக்காது. ஒரு துறவி மடாலயம் திரும்புவது போல நிதானமாக அச்சேவல் அவனை நோக்கித் திரும்பிவரும். அவன் சேவற்கட்டில் வென்ற பரிசினை ஒருபோதும் பெற்றுக்கொள்வதில்லை.

வீடு திரும்பும் வழியில் தோளில் சேவலை நிற்கச் செய்தபடியே உற்சாகமாகப் பாடிக் கொண்டு வருவான்.

அவ்வளவு தான் அவனது மகிழ்ச்சி. 

From s.raa's website (Sharing from S Ramakrishnan's FB page)

கொரோனோ வைரஸ்

சைனா மொழியை கூகுள்ல போட்டு தேடினதுல கொரானா வைரஸ்ன்னா என்ன, அங்க இப்போ என்ன அப்டேட் இருக்குன்னு எனக்கு புரிந்தவரை விளக்குகிறேன்....

武汉肺炎新型冠状病毒 இதுதான் கொரானா வைரஸ்கான சைனா வார்த்தை, இதை காபி பேஸ்ட் பண்ணி தேடுங்க, நம்மூரு செய்திகள்ல வெளிவராத தகவல்கள்  நிறைய கிடைக்கும்

பின்வரும் இந்த இரண்டு ட்வீட் கள் தான் கொரானாவின் கொடூரத்தை உலகிற்கு உணர்த்தியது, சமூக வலைதளங்களை  பரபபபாக்கிய முதலில் வந்த செய்தி

"ஒரு ஏஜென்ஸ் பிரான்ஸ் செய்தியாளர் 31 ஆம் தேதி தெருவில் விழுகிறார் அவருக்கு வுஹான் நிமோனியா இருப்பதாக சிலர் கூறுகின்றனர். அதே காலங்களில் இன்னும் சிலர் மர்மமான முறையில் உயிரிழக்கிறார்கள் யாருடைய சடலத்தையும் பரிசோதனை செய்ய கொண்டு செல்ல படவில்லை 

அப்படியே தகனம் செய்கிறார்கள், எனவே இறப்புகளின் உண்மையான காரணம் யாருக்கும் தெரியாது"

அடுத்தது கீழே

"என் அம்மாவுக்கும் எனக்கும் உடல்நிலை சரியில்லை,  இங்கே யாரும் உணவு அல்லது மருந்து அனுப்பவில்லை. இன்று என் நண்பர் அனுப்பிய வீடியோ, இப்போது நான் மரணத்தைப் பார்க்கிறேன், உணர்ச்சியற்றவனாக உணர ஆரம்பிக்கிறேன், என் வெப்பநிலை குறையத் தொடங்குகிறது"

"பாதுகாப்பு துறை நான் வாயை மூட வேண்டும் என எதிர்பார்க்கிறது, வுஹானில் ஏற்பட்ட தொற்றுநோய் ஒரு பெரிய மனிதாபிமான பேரழிவை ஏற்படுத்தியுள்ளது. மனசாட்சி உள்ள நான் எப்படி அமைதியாக இருக்க முடியும், தொலை தொடர்பே இல்லை இந்த டிவீட்டை மட்டுமே செய்ய முடிகிறது, அதிகாரியால் மட்டுமே கொரோனா பாதிப்பு   செய்திகளை வெளியிட முடியும்", என்றது அடுத்த பிரபலமான ட்விட்

கொரானா விலங்குகள் மூலம் அசாத்தியமான முறையில் பரவியது என்று கண்டுபிடித்திருக்கிறார்கள். முதலில் கண்டு பிடித்த லீ வென்லியாங் என்ற 34 வயது டாக்டரை தவறான தகவல் பரப்புவதாக கூறி கைது செய்து, பின்னர் விடுதலை தந்து நோயாளிகளுக்கு சிகிச்சை தர சொன்னது சீனா அரசு, அவர் கொரோனோ பாதிப்பால் நேற்று இறந்தார்.

"உலகளாவிய சுகாதார அவசரநிலை" என்று அறிவித்தும் தொற்றுநோயைக் கையாள்வதற்கான அரசாங்கத்தின் நடவடிக்கைகள் குறித்து ஹாங்காங் மக்கள்  கடுமையான அதிருப்தி அடைந்துள்ளனர்.

பாக்டீரியாவுக்கு வளர்ச்சி குறைவு, மருந்து சீக்கிரம் கண்டுபிடிக்கலாம், கட்டுப்படுத்தலாம், அழிக்கலாம். கொரோனோவை போன்ற வைரஸ் அப்படியல்ல, நேற்று ஆறு மாத குழந்தையாக இருந்த ஒருவன் இன்று 20 வயது வாலிபனாக மாறி நாளை 60 வயதுடையவனாக மாறுவது போன்றது, ஏன் இப்படி என கண்டுபிடிக்கவே மாதங்கள் தேவை, பின்னரே மருந்து சாத்தியம். ஆகவே நிலவேம்பு கசாய வதந்திகளை நம்பாதீர்கள், சீனாவில் இணைய கட்டுப்பாடு உண்டு, உண்மை தாமதமாக வெளிவரும் அல்லது வராது, கிட்டத்தட்ட ஒரு கோடி பேரை வுவான் நகரில் தனிப்படுத்தி செத்தாலும் பரவாயில்லை என வைத்திருக்கிறது அவ்வரசு. கொரோனோவை கட்டுப்படுத்தவோ தடுக்கவோ முடியவில்லை என உலகத்துக்கு சொல்லி விட்டார் அந்த அதிபர்.

இந்தியாவிற்கு பயணிகள் மூலம் உள்ளே வருவது தடுக்க படலாம், சீன-நேபாள-இந்திய எல்லைப் பகுதிகளில் பாதுகாப்பு குறைவு, அங்கிருந்து பரவ வாய்ப்பு உண்டு. இவ்வளவு மக்கள் தொகைக்கு போதுமான மருத்துவ வசதிகள் சீனாவிலோ, இந்தியாவிலோ மிகக்குறைவு. தற்போது தமிழ்நாடு கொரானாவால் பாதிக்கப்படவில்லை, அதனால் நமக்கு வரும்போது கவலைப்படலாம்,

பாஸிடிவ் பக்கங்கள்

சீன நர்ஸ்களின் பணி மிகவும் போற்றத்தக்கது, நேரம், காலம் பார்க்காமல் பணிபுரிகிறார்கள், அவர்கள் முகமூடிகள் முகத்தையே சிதைத்த போதிலும். தேவதைகள்.

பல நாடுகள் சீனாவில் இருக்கும் தன் நாட்டு மக்கள் திரும்பி வருவதை விரும்பாத போது, இந்தியா தனி விமானத்தில் நம் சகோதரர்களை அழைத்து வந்திருக்கிறது.

கேரளாவில் கொரானாவுடன் வந்தவர்கள் பூரண குணமாகி விட்டதாக கேரள அரசு தெரிவித்துள்ளது.

பொதுவாக இந்தியர்களின் மரபணு, கொரானாவிற்கு எதிரான தன்மையுடன் காணப்படுகிறது எனவும், பாதிப்பு குறைவாக இருக்கும் எனவும் மரபணு வல்லுநர்கள் கூறுகின்றனர்.