வலைபேசி 2

  பிடித்த ட்விட்டுகள் தொடர்கின்றன. 



குரங்கில் இருந்து வந்திருக்க வாய்ப்பில்லை அநேகமாக குரங்கு இனத்தில் இருந்து அடித்து துரத்தப்பட்டு வந்திருப்பான் மனிதன். 

------------------------------------------------------------ 



இஸ்லாமியர்களை போல் அனைத்து பெண்களும் பர்தா அணிய வேண்டும் மதுரை ஆதீனம் 

நீ முதல்ல சட்டையை போடு



------------------------------------------------------------ 


குழந்தை வளர்ப்பை குழந்தைகளிடமே கற்றுக்கொள்ளுங்கள், அவர்கள் பொம்மைகளை அழ விடுவதில்லை 

------------------------------------------------------------ 


தன்னை அறியாமல் ரஜினி பலநேரம் தனக்குள் இருக்கும் எம் எஸ் பாஸ்கரை வெளியே விட்டு விடுகிறார் 

------------------------------------------------------------ 

 வெறுப்பை உள்வாங்கி கொள்கிறோம் அன்பை அலட்சியம் செய்து தூர வைக்கிறோம்


------------------------------------------------------------ 

"காபி டே" எனப் பெயரிட்டவர் நிச்சயமாக ஒரு திருநெல்வேலிக்காரராகத்தான் இருக்க வேண்டும்!

------------------------------------------------------------ 

பிடிக்காத இடத்திலிருந்து சட்டென வெளியேறும் சுதந்திரம் பால்யத்தோடு முடிந்துவிடுகிறது 

------------------------------------------------------------ 

"பாவாயா பேரனா?" என்று முன்பு எங்கள் ஊரில் சில கிழவிகள் கேட்பார்கள், அதைத்தான் "People you may know?" என்கிறது இந்த facebook

------------------------------------------------------------ 

சீனாவில் காற்றை பாக்கெட்டுகளில் அடைத்து விற்பனை -செய்தி. 
நீ ரொம்ப லேட்டு, லேஸ் காரன் அதை பண்ணி பல வருசமாச்சு

------------------------------------------------------------  

       அசதியா இருக்குன்னு ஒரு நிமிசந்தான் கால நீட்டி உட்கார்ந்தேன்!  "கொடுத்து வச்ச வாழ்க்கையா"ன்னு ஒருத்தர் பாராட்டிட்டு போறாரு :(

------------------------------------------------------------   

மல்டிப்ளெக்ஸ் தியேட்டரில் எதுவும் சாப்பிடாமல் உட்கார்ந்திருப்பவன் கஞ்சன் அல்ல, புத்திசாலி  

------------------------------------------------------------   

திடீரென ஒருவன் நூறு எதிரிகளை சம்பாதிக்க, சிக்னலில் வண்டி ஆப் ஆவதே போதுமானதாக இருக்கிறது  

------------------------------------------------------------   

   சரக்கடித்த பின் பழைய கேர்ள் பிரெண்ட்ஸ்க்கு மெசேஜ் அனுப்பாமல் தடுக்கும் App இருந்தா எவ்வளவு நல்லா  இருக்கும் !!

------------------------------------------------------------

முடிவை யூகிக்க முடியாத சில வரிக் கதைகள்

டாஸ்மாக் உரையாடல்
"உனது தாய்தான் உலகத்திலேயே அற்புதமான உடலமைப்பு கொண்ட அழகி"
"நீ நிறைய குடித்துவிட்டாய், வீட்டுக்கு போகலாம் வா, அப்பா'

_______________________

"எல்லோரும் போகும் பாதையில் செல்வதை விட, அதற்கு எதிராக செல்பவன் அதி புத்திசாலி" என்ற என் விளக்கத்தைக் கேட்டும், ஒன்வேயில் வந்ததற்க்கான அபராத பேப்பரை என் கையில் கொடுத்தார் போக்குவரத்து காவலர்.

_______________________

"ஆண்டவா ஆண், ஆம் அது ஆண்" என கத்திக்கொண்டே ரூமை விட்டு வெளியே வந்தான்.

இனி தாய்லாந்தின் பக்கம் திரும்பிக்கூட பார்க்கக்கூடாது என்றும் முடிவு செய்து கொண்டான்
_______________________

பெரும் பணக்காரனுக்கு பிறக்க இந்தக் குழந்தை அதிர்ஷ்டம் செய்திருக்கிறது என்றனர் பொதுமக்கள்.

பணக்காரனால் கருவிலேயே கொல்லப்பட்ட குழந்தைகள், சொர்க்கத்தில் இதை கேட்டதும் கடும் கோபம் கொண்டனர்.

_______________________
தொலைபேசி உரையாடல்:

மனைவி: windowவை திறக்க முடியவில்லை என்ன செய்ய.

கணவன்: அதன் மேல் நிறைய எண்ணெய் ஊற்றி ஊற வைத்து அரைமணி நேரம் கழித்து திற.

அரைமணி நேரத்திற்கு பிறகு.

மனைவி: இப்போது திறக்க முயற்சித்தேன், லேப்டாப்பே வெடித்து சிதறி விட்டது.

_______________________

காதலும், முத்தங்களும்.

"நான் அவளுக்கு, இந்த அழகான ரோஜா பூங்கொத்தைக் கொடுத்தாள், என்னை முத்தமிட்டு கொண்டே இருப்பாள்" என தன்னிடமிருந்த சேமிப்பு முழுவதையும் கொடுத்து கடைக்காரரிடம் பூங்கொத்தை வாங்கினான் அவன்.

"இது போன்ற பத்து வயது சிறுவர்கள் மிகக் கெட்டுப்போய் விட்டார்கள்" என்று புலம்பினார் கடைக்காரர்.

பூங்கொத்தை வாங்கிய சிறுவன் தன் அம்மாவின் கல்லறை மேல் படுத்துக்கொண்டு அவளுக்கு மிகப் பிடித்த ரொஜா பூங்கொத்துடன் அவள் வந்து முத்தமிட காத்திருந்தான்

_______________________

வலைபேசி 1

 கடந்த சில வருடங்களுக்கு முன்பிருந்து நான் மிகவும் ரசித்து மறக்க இயலா பல ட்விட்டுகள் (கல்வெட்டுகள் அல்லது நங்கூரம்) தான் இந்த மலரும் நினைவுகள்...

எங்க தாத்தா கடைசிவரை சுதந்திரத்துக்கு போராடினார் எங்க பாட்டி தரவே இல்லை
---------------------------------------

"காக்கா ஜெயிச்சாலும் நரி ஜெயிச்சாலும் வடை பாட்டிக்கு கிடைக்க போறதில்ல. நாமதான் அந்த பாட்டி #அரசியல் #வட போச்சே!"
---------------------------------------

வகுப்பறையில் டீச்சர் "வெளியே போ" என திட்டினால் வாதத்தில் வென்று விட்டாய் என்று அர்த்தம்.
---------------------------------------

கல்யாண சமையல் அண்டாவில் காயை தேடுவது போலவே இருக்கிறது ஹர்பஜன் பேட்டிங் ஸ்டைல்

--------------------------------------- 

ரூபாய் நோட்டுக்களாக மாற்றப்படாத எந்த திறமையும் ஜெயிப்பதில்லை.
---------------------------------------

"மச்சி சாம்பார் வைக்கவா? ரசம் வைக்கவா?" "
முதல்ல ஏதாவது செய்டா, அப்புறம் பேர் வைக்கலாம்" பேச்சுலர் ரூம் பேஜார்கள்.
---------------------------------------

ஆழம் தெரியவேண்டுமானால் காலை விடாதே அடுத்தவனை தள்ளிவிடு #கார்போரேட் விதி
---------------------------------------

மனைவி கஸ்டமர் கேர் ரெண்டுமே ஒண்ணு. பிரச்சனைன்னு போன் பண்ணா அவங்க சொல்றதை தான் சொல்வாங்க, நாம என்ன சொல்றோம்னு கண்டுக்கவே மாட்டாங்க
---------------------------------------

குழந்தைகளுக்கு குழந்தைகளே தடையாக இருக்கின்றன. நான் நடுவுலதான் படுப்பேன்
---------------------------------------

ரம்யா நித்யா ஓவியா பேருக்கு பின்னாடி ஆம்பளை பேரை சேத்திக்கிட்டா மட்டும் நாங்க ஒரிஜினல் ஐடின்னு நம்பிருவமா #பிளடி பேக் ஐடி ப்ராடுகளா... பிச்சு... பிச்சு
---------------------------------------

மனைவி சமையல் பழகும் முன் மனைவி சமையல் பழகி விடுகிறது.
---------------------------------------

ஆபீஸ் கேன்டீன்ல ஒருத்தி அந்த ஒயிட் சட்னி கொடுன்னான்னு கேட்குறா, ஏண்டி உனக்கு நிஜமா அது தேங்கா சட்னின்னு தெரியாது
---------------------------------------

 போண்டா வடையோடு ஒப்பிட்டால் பஃப்ஸ்ல்லாம் வெறும் பித்தலாட்டம்.
---------------------------------------

புன்னகை வழிய போன் பேசுபவன் ஒன்று புதிதாய் பெண்ணுடன் பேச வேண்டும் அல்லது புதிய பெண்ணுடன் பேசவேண்டும்.

---------------------------------------

உலக அளவில் எல்லா மனிதர்களுக்கும் ஒருமுறையாவது நம்பிக்கை துரோகம் கடவுளால் செய்யப்பட்டிருக்கும்

--------------------------------------- 

பொங்கிய பீரை அடைக்க பூந்தியை உள்ளே போடும் விங்ஞானி யார் என்று யோசித்து கொண்டிருக்கிறேன் என்ன ஒரு கண்டுபிடிப்பு

---------------------------------------  

கிரிக்கெட்டில் விளையாடுவதே பத்து நாடு, இதில் செஞ்சா எப்படி உலக சாதனைன்னு சொல்றாங்களோ 

---------------------------------------  

வலைபேசி 2,3,4 என இதன் தொடர்ச்சியை வரும் நாட்களில் பதிவிடுகிறேன். கூகுளிலோ, ட்விட்ரிலோ follow செய்யுங்கள், பதிவிடுகையில் அப்டேட் கிடைக்கும். தங்களுக்கு மிகவும் பிடித்த பழைய ட்விட்களையும் பின்னூட்டம் இடலாமே?

இளையராஜா 75

இளையராஜாவை பற்றியோ அவர் பிறப்பு மற்றும் நுண் தகவல்களை பற்றியோ நான் சொல்ல வேண்டியதில்லை. ஏனெனில் கூகுள் என்னை விட அதிகமான விபரங்களை வைத்திருக்கும்.

எனக்குள்ளும் என்னை சுற்றிய மனிதர்களுக்குள்ளும் ராஜா எனும் இசை பெருங்கடல் ஏற்படுத்திய தாக்கங்களை சொல்வதே என் விருப்பம். ராஜா தன் இசை மூலம் என் சோர்ந்த தருணங்களில் மீட்டெடுத்து, மகிழ்ச்சியான தருணங்களை தந்து, ஏதாவது ஒரு பாடல் மூலமாக பல நினைவுகளை கிளறி விடும் அந்த அற்புதத்தை தான் நினைவு கூற விரும்புகிறேன்.

கால் நூற்றாண்டை கடந்து விட்ட நிலையிலும் "இளமை இதோ இதோ" என்று என்றோ இசையமைத்த அந்த பாடல் தான் இன்றைக்கும் புத்தாண்டு பாடல்.  எல்லா மதமும் போற்றும்படியான, காலத்தால் அழிக்க இயலா பாடல்களை படைத்திருக்கிறார் ராஜா.

எண்பதுகளின் மத்தியில் வந்த மோகன் படங்கள், இளையராஜாவின் பாடல்களுக்காகவே சூப்பர் ஹிட் அடித்துக் கொண்டிருந்தன என்பதிலிருந்தே அவரின் இசை ஆளுமையை புரிந்து கொள்ளலாம்.

தொண்ணூறுகள் இளையராஜாவின் காலம். அவர் அந்த சமயங்களில் இசையமைக்காத படங்கள் வெகு குறைவே எனலாம். கதாநாயகர்கள் படத்தைவிட  இளையராஜாவின் படத்தை பத்திரிகைகளில் முன்னிருத்தி விளம்பரம் செய்யப்பட்டன.

எனக்கு முந்தைய தலைமுறைகளான  எனது மாமா, அத்தை, அக்கா, சித்தி போன்றவர்களுடைய ரத்தத்தில் இளையராஜா கலந்திருப்பார். அவர்கள் பாடும் பாடலில் ஒரு வரி கூட பிசகாமல், தாளம் கூட மாறாமல் அப்படியே பாடும் வல்லமை அவர்கள் பெற்றிருந்தார்கள்.

நம்மைச் சூழ்ந்து நிற்கும் துன்பங்களை கூட மாற்றி அதை துடைத்து தூர எறியும் வல்லமை இளையராஜாவின் இசைக்கு உண்டு.

இளையராஜாவின் திருவாசகம் கேட்டு நெகிழ்ந்து கண்ணீர் வடித்த ஒரு நாத்திக நண்பனை எனக்குத் தெரியும்.

எனது காரில் இளையராஜாவின் இசையின் துணைகொண்டு எவ்வளவு தூரமானாலும், தனிமையிலும் அழகாக மகிழ்ச்சியாக கடக்க முடியும்.

ராஜாவின் பாடல்களை ஒலிக்கவிடும் பஸ் டிரைவர்கள் பயணிக்கும் பயணிகளை சுகமான உலகத்திற்கு கூட்டிச் செல்கிறார்கள்.

வெறும் இசை என்று தவறாக நினைக்காதீர்கள் நம் இறந்தகால நினைவுகளை மீட்டித்தரும் டைம் மெஷின்.

"கண்ணே கலைமானே", "காதலின் தீபம் ஒன்று", "என்ன சத்தம் இந்த நேரம்", "மண்ணில் இந்த காதலன்றி", "ஓ பட்டர்பிளை", "கேளடி கண்மணி", "தாலாட்டும் பூங்காற்று நானல்லவா?", "மாலையில் யாரோ மனதோடு பேச", "வலையோசை கலகலவென", "ராஜராஜ சோழன் நான்" என  குறைந்தது 50 மெல்லிசை பாடல்களையாவது நான் உங்களுக்குச் சொல்ல முடியும். அவை மயிலிறகால் வருடும் சுகம் என்ன என்பதை நேரடியாக உணர்த்துபவை.

இந்த பரபரப்பான வாழ்க்கையில் இருந்து என்னை தப்புவிக்க மொட்டை மாடியும், இளையராஜாவும் கிடைத்தது எனக்கான முந்தைய ஜென்ம வரங்கள். இந்த ஜென்மம் எனக்கு ராஜாவின் இசையின் ரசிப்பிற்காக படைக்க பட்டிருக்கிறது

நன்றி ராஜா சார். 

இன்னும் பல வருடங்கள் நலமுடன் வாழ்க. 

மீனவ நண்பர்கள்

எனது மச்சினன் செந்தில் வீட்டிற்கு சென்னை சென்ற போது, பழவேற்காடு பகுதியிலிருந்து மீனவர்கள் செல்லும் படகு வழியாக சென்றால் தனித்தீவுகள் இருப்பதாகவும், அது வித்தியாசமான அனுபவமாக இருக்கும் எனக்கூறி எங்கள் பயணத்தை திட்டமிட்டிருந்தார்.

அவர் வீடான பெருங்குடியில் இருந்து, கிட்டத்தட்ட எழுபது கிலோ மீட்டர் தூரத்தில் இருப்பதாகவும் அது மீனவர்கள் வாழும் பகுதி எனவும் முன்னுரை தந்தார். எனக்கு சென்னை மனிதர்கள் மீதும், மீனவர்கள் மீதும் கரடுமுரடானவர்கள், மரியாதை தெரியாத பேச்சுக்கு சொந்தக்காரர்கள் என்ற பொது புத்தி இருந்தது. அதன் யோசிப்பிலேதான் அங்கே சென்றேன். நாங்கள் குடும்பமாக சென்று கொண்டிருந்தோம் இரண்டு குழந்தைகள் வேறு. அங்கிருந்த மாதா கோவிலை நெருங்கிய போது சுற்றிலும் மீன் வாசனை, குடிசைகளும் சிறு வீடுகளும் அடங்கிய பகுதி, லுங்கி கட்டிக்கொண்டு பீடி பிடித்தபடி "இன்னா" என்ற மனிதர்கள் வரவேற்றார்கள்.

பரசுராம் என்பவரை தேடி அங்கே போனோம், அவர் கடலுக்குள் மீன் பிடிக்க சென்று விட்டதால், அவரின் மருமகன் தினேஷ் எங்களை வரவேற்றார். அவர் ஏனோ சற்று பரபரப்பாகவே இருந்த போதிலும், பார்த்த முதல் வார்த்தையே "துன்னாச்சா" என்றார். கையில் சாப்பாடு எடுத்து வந்திருக்கிறோம் என்று சொன்னதும், "பரவால்ல நம்ம ஊட்டுல பிரியாணி துன்ணுட்டு போலாம் சார்" என்று வற்புறுத்தினார்.
"பரவாலைங்க, போயிட்டு வந்து பாத்துக்கலாம்" என்று தப்பித்து சென்று படகு இருக்கும் இடம் கேட்டோம். அவர் தனது மாமா என்று ஒரு வயதானவரை அறிமுகம் செய்து வைத்து அவருடன் அனுப்பி வைத்தார், படகில் ஏறிய சிறிது நேரத்திலேயே என்ன மாயம் செய்தாரோ அந்த முதியவர் எங்கள் குழந்தைகள் அவரிடம் ஒட்டி கொண்டன.  சிரித்து விளையாடியபடியே சென்ற அந்த பயணம் வெகு நிறைவு, மாசு படறா மேகமும், குப்பைகள் இல்லா கரையும் சுத்தமான பகுதியும் எங்களை  ஆச்சரியத்திலும் பேரழகிலும் ஆழ்த்தின.

பயணம் முடித்து திரும்பி கரைக்கு வரும்போது எனக்கு ஏனோ அந்த பெரியவரின் மேல் இனம் புரியா ஈர்ப்பு இருந்தது. "நீங்களும் மீன் தான் பிடிக்கறீங்களா?" என்று கேட்டதற்கு "இல்ல தங்கம், நான் தினேஷ் தங்கச்சி கண்ணாலத்து வந்தேன் அவனுக்கு நெறையா வேல கெடக்கு அதான் ஹெல்ப் பண்றேன்" என்றார். எல்லோரையும் "தங்கம்" என்றே அழைத்தார்.

"எப்போ கண்ணாலம்?" என்று அவர் பாஷைக்கே மாற முயற்சித்தேன். "இன்னம் ஒரு வாரம் இருக்கு" ஒரு வாரத்திற்கு முன்பே சொந்தங்கள் வந்து தங்கி கல்யாண வேலைகளை பகிர்ந்து இயன்ற வரை பண உதவி செய்து திருமணத்தை சிறப்பித்து விட்டு செல்வார்களாம்.

 "நான் தினேஷ் வீட்டுக்கு வரலாமா?" என்று கேட்ட உடனே "வா தங்கம்" என்று கை பற்றி அழைத்து சென்றார். இவ்வளவு வாஞ்சையான கை பற்றுதலை என் பாட்டிக்கு பிறகு இவரிடம் தான் உணர்ந்தேன்

சுற்றிலும் மீன் வாசம் கமழ, "கொட்டு கலி கொட்டு நாயனம் கேட்குது" என்ற
மைக் செட் பாடலுடன் அமர்க்கள பட்டு கொண்டிருந்தது ஒரு வீடு. தினேஷ் வாழை மரம் கட்டி கொண்டிருந்தவர் எங்களை பார்த்து ஓடி வந்தார்.
"கிளம்பறோம் என்று சொல்ல வந்தோம்" என்றேன், "இன்னா சார் நீ? லேடீஸ் வந்துருக்காங்க வீட்டுக்கு வாங்க, என்று ஒரு குழந்தையை அழைத்து "மேகா, ரெண்டு அக்காவையும் கூட்டிட்டு போய் கால் கழுவ வையி" என்றார், நாங்கள் தயங்க "அட போ தங்கச்சி" என்று அருகில் இருந்த வீட்டிற்குள் செல்ல வைத்தார். பின்னர் எங்களை பார்த்து "நமக்கென்ன சார், எங்க வேனா மூத்திரம் போவோம், லேடீஸ் என்ன பண்ணுவாங்க, இன்னும் ரெண்டு மணி நேரமாகும் நீங்க வீட்டுக்கு போக" என்றார். அதற்குள் எனக்கும் செந்திலுக்கு காபி வந்து சேர்ந்தது. வீட்டை விட்டு வெளியே வந்த இருவரும், "வீடு சின்னதா இருந்தாலும் எவ்ளோ அழகா இருக்கு தெரியுமா? சாப்பிட சொல்லி ஒரே வற்புறுத்தல், இப்போ தான் சாப்பிட்டோம்னு சொன்ன உடனே வீட்டுக்கு வந்திருக்கே ஸ்வீட் சாப்பிடாம போக கூடாது"ன்னு சாப்பிட வச்சு அனுப்பினாங்க என்றார்கள்.

மிக எளிய வாழ்க்கை வாழ்கிற, மனதில் ஈரம் கொண்ட, யாரென்றே தெரியாமல் வரவேற்கிற, ரோட்டில் யாராவது அடிபட்டால் உடனே முதலில் ஓடிப்போய் தூக்குகிற உண்மையான மனிதர்களையே  என் வாழ்வில் இப்போதுதான் சந்திக்கிறேன். அடுத்தமுறை நான்கு நாள் தினேஷ் வீட்டில் தங்க அனுமதி கேட்டிருக்கிறேன். "ஒரு போன் பண்ணிட்டு எப்ப வேனா வா, நான் இருந்தாலும் இல்லான்னாலும் நம்மாளுங்க இருப்பாங்க, ஜாலியா இருந்துட்டு போலாம்" என்றார். அங்கே போய் இரண்டு நாட்களாவது தங்கிவிட்டு தினேஷையும், பெரியவரையும் நான்கு நாட்களுக்கு என் வீட்டிற்கு இழுத்து வந்துவிட வேண்டும் என்பது எனது அடுத்த பயண திட்டம்

முதல் விமான பயணம் -சில டிப்ஸ்

கொஞ்சம் விமான பயணங்களை கடந்து விட்டவன் என்ற முறையில் முதல் விமான பயணம் போகும் ஆசை உள்ளவர்களுக்கான சிறிய வழி காட்டல் இது. (அடிக்கடி விமானத்தில் பறப்பவர்கள் படித்து விட்டு கீழே ஆலோசனை சொல்லுமாறு அன்புடன் கேட்டுக்கொண்டு...)
பதினைந்து நாட்களுக்கு முன்னதாக புக் செய்தால் கூட ஆயிரத்து ஐநூறுக்குள் தமிழ்நாட்டின் உள்விமான போக்குவரத்தோ (சென்னை -கோவை போல), பெங்களூருவோ நீங்கள் தாராளமாக சென்று வரலாம்.
எல்லா விமான நிறுவனங்களும் (Economic flights) தங்களுக்கு பயணிகள் சேரும் வரை offer கொடுத்துக்கொண்டே இருப்பார்கள். கூகுளே (Search: Google flights)  அதன் விலை விபரங்களை தேதி வாரியாக வெளியிடும். எனவே டிக்கெட்டை முன் பதிவு செய்து கொள்ளுங்கள். இறக்கைகள் மறைக்காத கீழே பார்க்கும் வண்ணம் சீட்டை தேர்ந்தெடுங்கள்.

உங்கள் விமானம் புறப்படும் நாற்பத்தி ஐந்து நிமிடங்களுக்கு முன்பே விமான நிலையத்தை அடைந்து விடுங்கள். உள்நாட்டு விமான பயணத்தில் நீங்கள் ஏதாவது ஒரு அரசு ஆதார சான்றிதழை வைத்திருந்தால் போதுமானது (லைசென்ஸ், வோட்டர் ஐடி, ஆதார்)  உங்களுக்கான பயண சீட்டையோ, மொபைலில் உள்ள டிக்கெட்டையோ முன்னால் நின்றிருக்கும் காவல் பாதுகாவலரிடம்  காண்பித்து விமான நிலையத்திற்குள் நுழையுங்கள்.

நீங்கள் எவ்வளவு கிலோ வரை பொருட்கள் கொண்டு செல்லலாம் என்பதை நீங்கள் செல்ல வேண்டிய விமான பயண குறிப்பில் சோதனை செய்து கொள்ளுங்கள். Hand luggage எனப்படும் கைபையில் ஏறக்குறைய பதினைந்து கிலோ வரை அனுமதி இருக்க கூடும். கத்தி, ப்ளேடு, கூர்மையான ஊசிகள், வாசனை திரவியங்கள் போன்ற தடை செய்த பொருட்கள் எவை என்ற குறிப்பை படித்து விட்டு அவற்றை எடுத்து செல்வதை தவிருங்கள்

விமான சீட்டு பாதுகாப்பு முடிந்ததும் உங்களை கைப்பை சோதனை நடக்கும், அதை சோதித்த பின் நேராக நீங்கள் செல்ல வேண்டிய விமானத்தின் அலுவலகம் இருக்கும் பகுதியை கேட்டு தெரிந்து கொண்டு (அழகான பெண்கள் இருப்பார்கள்) அவர்களிடம் போர்டிங் பாஸ் பெற வேண்டும். அங்கேயே உங்கள் விமானம் எந்த வாசலுக்கு வரும், நீங்கள் எங்கு சென்று காத்திருக்க வேண்டும் என்ற தகவலை கூறுவார்கள். விமான நிலையத்தின் காத்திருப்பு அறைக்கு முன் மீண்டும் ஒரு சோதனை நடக்கும்.

உங்கள் பர்ஸ், போன், சாவி, மற்ற எதுவாக இருந்தாலும் கைப்பையில் வைத்து சோதனைக்கு அனுப்ப வேண்டும், இல்லை எனினும் பிளாஸ்டிக் தட்டு வைத்திருப்பார்கள் அதில் வைக்கவும். உங்களது போர்டிங் பாஸ் மற்றும் டிக்கெட்டை மட்டும் கையில் வைத்திருங்கள், அதை சரி பார்த்த பின் கையை விரிக்க சொல்லி சோதனை நடத்துவார்கள். அதன் பின் நீங்கள் காத்திருப்பு அறைக்குள் சென்று உங்களது விமானத்திருக்காக காத்திருக்க வேண்டியது தான்

காத்திருப்பு பகுதியில் உங்கள் விமானத்திற்கான அறிவிப்பு வந்ததும் வரிசையில் சென்று போர்டிங் பாஸ் கொடுத்து அவைகளை சரி பார்த்த பின் உங்களை விமானத்தின் அருகில் அழைத்து செல்ல ஒரு பஸ் நின்றிருக்கும்.
அல்லது ஒரு சில தளங்களில் நேரடியாகவே செயற்கை படிகள் வைத்து விமானத்திற்குள் செல்லும் அமைப்பு இருக்கும்.

விமானத்தில் ஏறியதும் சிரித்தபடி வரவேற்க விமான பணிப்பெண்கள் இருப்பார்கள், Air India, spicejet  போன்றவற்றில் ஆண்களும் இருந்து கடுப்படிப்பார்கள். இருக்கைகள் எல்லாம் பிரம்மாண்டமாக இருக்கும் என்றெல்லாம் கற்பனை செய்து கொண்டு போகாதீர்கள், உயர்தர பஸ் இருக்கையை போன்றே இருக்கும். ஏனெனில் அது ஏர்பஸ் தானே?   
 விமானத்தில் ஏறியதும் மொபைலை ஆப் செய்தோ அல்லது Airplane மோடிலோ வைக்க சொல்வார்கள் சீட் பெல்ட் போட சொல்லி அறிவுறுத்துவார்கள்.  விமானம் ஒரு குறிப்பிட்ட தூரத்தை ஒரு மணி நேரத்தில் அடையும் என்று கூறினால் ஏற இறங்க மட்டுமே அதில் பாதி நேரத்தை எடுத்து கொள்ளும் பறக்கும் நேரம் அதில் பாதி மட்டுமே.

அவ்வளவுதான்...
சென்று அனுபவித்து விட்டு பின்னூட்டம் இடுங்கள்